Ermənistan-Türkiyə sərhədi yalnız BU ŞƏRTLƏ açıla bilər
Görüşdə iki ölkə arasında sərhədlərin açılması məsələsinin müzakirə ediləcəyi gözlənilir. Həmçinin Ermənistan-Azərbaycan arasında sülh sazişi layihəsi ilə bağlı da danışıqlar olacağı ehtimal edilir.
Modern.az-a açıqlamasında Türkiyə Böyük Millət Məclisinin hakim Ədalət və İnkişaf Partiyasından olan üzvü, Türkiyə-Azərbaycan Dostluq Qrupunun sədri Şamil Ayrım bildirib ki, Paşinyanın Türkiyəyə səfəri çərçivəsində bir sıra yeniliklər ola bilər:
“Mən detalları bilmirəm. Lakin Türkiyənin sərhədlərin açılması ilə bağlı mövqeyi dəyişməzdir. Azərbaycanla Ermənistan arasındakı problem həll olunmadan, qətiyyən sərhədlər açılmaz. Düşünürəm ki, bu məsələ mütləq Azərbaycanla müzakirə edilir”.
Milli Məclisin Beynəlxalq münasibətlər və parlamentlərarası İşçi Qrupunun üzvü Elman Nəsirov söyləyib ki, Ermənistanla Azərbaycan arasında sülh sazişinin imzalanması iki dövlət və xalq arasında etimad mühitinin formalaşması ilə bağlıdır:
“Sülh müqaviləsinin 17 bəndi üzrə razılaşma var. Azərbayacanın daha iki şərti var: Ermənistan konstitusiyanın dəyişdirilməsi və Minsk qrupundan imtina. Bu şərtlər də ödənildikdə sülh müqaviləsinin imzalanması üçün heç bir mane qalmayacaq. Gələn il iyul ayının 7-də Ermənistanda parlament seçkiləri keçiriləcək. Həmin gün konstitusiya dəyişikliyi üçün referendum da keçirilməsi də istisna deyil".
Elman Nəsirov qeyd edir ki, Ermənistanda hazırda konstitusiyanın dəyişdirilməsi prosesinə mane ola biləcək yeganə qüvvə kilsədir, II Qaregindir:
"Paşinyan artıq faktiki olaraq, onu da sıradan çıxarmağa başlayıb. Bununla da revanşistlərin də mövqeləri xeyli zəifləşmiş olacaq. Bütün bunların fonunda Paşinyanın Türkiyəyə səfər etməsi və cənab Rəcəb Tayyib Ərdoğanla görüş imkanı əldə etməsi, görüşün sonunda yekun bəyanatın da səslənməsi, heç şübhəsiz Türkiyə ilə Ermənistan arasında etimad mühitinin yaranmasına şərait yaradır. Türkiyə Prezidenti cənab Rəcəb Tayib Ərdoğan da, təbii ki, Paşinyanla görüşdə onu başa salacaq. Türkiyənin mövqeyini çox yaxşı bilirik. Yəni deyəcək ki, Azərbaycana və Türkiyəyə qarşı ərazi iddialarından imtina et, bu şəkildə sülh müqaviləsi imzalamaq olmaz”.
Deputat vurğulayıb ki, Türkiyə ilə Ermənistan arasında yalnız bir halda sərhədlər açıla bilər:
“Ermənistan sərhədlərin açılmasını istəyərdi. Amma bu o zaman baş verə bilir ki, Ermənistan da sülh prosesi ilə bağlı real addımlar atsın. Konstitusiyada Azərbaycana qarşı ərazi iddialarından imtina etdikdə, Minsk qrupunu buraxdıqda və Zəngəzur dəhlizinin açılması ilə bağlı real addımlar atdığı bir şəraitdə niyə də Ermənistan-Türkiyə sərhədi bağlı qalsın? Bu, mümkün deyil. Hesab edirəm ki, bu proseslər bir-birilə sıx bağlıdır. Hesab edirəm, cənab Rəcəb Tayyib Ərdoğan bütün bu reallığı Paşinyana izah edəcək. Necə deyərlər, top Ermənistan tərəfindədir”.
