Azərbaycan Respublikasının Prezidenti cənab İlham Əliyevin Yeni Azərbaycan Partiyasının VIII Qurultayındakı nitqindən irəli gələn vəzifələrə dair Laçın Rayon İcra Hakimiyyətində geniş tərkibdə müşavirə keçirilmişdir.

Azərbaycan Respublikasının Prezidenti cənab İlham Əliyevin 2026-cı il 2 oktyabr tarixdə Yeni Azərbaycan Partiyasının VIII Qurultayındakı nitqindən irəli gələn vəzifələr ölkəmizin şəhər və rayonlarında geniş müzakirə edilir. Bununla əlaqədar Azərbaycan Respublikasının Prezidenti cənab İlham Əliyevin Yeni Azərbaycan Partiyasının VIII Qurultayındakı nitqindən irəli gələn vəzifələrə dair 2026-cı il 16 oktyabr tarixdə Laçın Rayon İcra Hakimiyyətində geniş tərkibdə müşavirə keçirilmişdir.
Müşavirədə Laçın Rayon İcra Hakimiyyəti başçısı Aparatının, Laçın Rayon Polis Şöbəsinin, şəhər, qəsəbə və kənd inzibati ərazi dairələri üzrə nümayəndəliklərin məsul işçiləri, Laçın rayonunun idarə, müəssisə və təşkilat rəhbərləri, ümumtəhsil məktəblərinin direktorları, şəhid ailə üzvləri, müharibə veteranları, rayon ictimaiyyətinin nümayəndələri iştrak etmişlər.
Müşavirədə Laçın Rayon İcra Hakimiyyəti başçısı Aqil Nəzərli Azərbaycan Respublikasının Prezidenti cənab İlham Əliyevin Yeni Azərbaycan Partiyasının VIII Qurultayındakı nitqindən irəli gələn vəzifələrə dair geniş məruzə ilə çıxış etmişdir. Rayon rəhbəri bildirmişdir ki, ölkəmizdə davamlı sosial-iqtisadi inkişafla yanaşı, ictimai-siyasi sabitliyin qorunması, milli-mənəvi dəyərlərin möhkəmləndirilməsi və gənc nəslin vətənpərvərlik ruhunda tərbiyəsi də qarşıda duran ən mühüm vəzifələrdəndir. Bu istiqamətdə aidiyyəti qurumların, təhsil müəssisələrinin, şəhər, qəsəbə və kənd icra nümayəndəliklərinin və ictimaiyyət nümayəndələrinin birgə fəaliyyəti gücləndirilməli, ailələr və gənclərlə maarifləndirici iş sistemli şəkildə təşkil olunmalıdır. Uşaqların zərərli informasiya təsirlərindən qorunması, valideynlərin maarifləndirilməsi və sağlam dünyagörüşünün formalaşdırılması daim diqqət mərkəzində saxlanılmalıdır. Eyni zamanda, ideoloji və təbliğat işi formal xarakter daşımamalı, cəmiyyətin aktual ehtiyaclarına uyğun qurulmalıdır. Rəsmi informasiya resurslarında məlumatların operativ, dolğun və düzgün təqdim edilməsi təmin olunmalı, hər bir müəssisə və təşkilat rəhbəri dövlət başçısının müəyyən etdiyi vəzifələrin öz kollektivində izahına və dövlətçilik prinsiplərinin təbliğinə məsuliyyətlə yanaşmalıdır.
Daha sonra məruzə ətrafında Laçın Rayon Ağsaqqallar Şurasının sədr müavini Səyyaf Məmiyev, Laçın Rayonu üzrə Təhsil sektorunun müdiri Nicat Həsənov, Vətən müharibəsi qazisi Cövhər Sadıqzadə, şəhid qardaşı Eldar Novruzov, Laçın rayonunun Ağanus kənd tam orta ümumtəhsil məktəbinin direktoru Nəzakət Quliyeva, əməkdar müəllim Varaşil Məmədov, 3 nömrəli Laçın Uşaq bağçasının müdiri, Laçın Rayon İcra Hakimiyyəti başçısı yanında Uşaq hüquqları komissiyasının üzvü İradə Həsənova çıxış etmişlər.
Çıxışlarda qeyd edilmişdir ki, güclü dövlət, möhkəm dövlətçilik, sağlam cəmiyyət və savadlı, vətənpərvər nəsil Azərbaycanın gələcək inkişafının əsas dayaqlarıdır. Bu dayaqları qorumaq və daha da möhkəmləndirmək isə hər bir Azərbaycan vətəndaşının üzərinə düşən çox mühüm və ən əsas vəzifədir. Vurğulanmışdır ki, məqsədimiz hamılıqla öz vəzifəmizi yüksək səviyyədə yerinə yetirmək, ölkə başçısı cənab İlham Əliyevin oktyabrın 2-də Yeni Azərbaycan Partiyasının VIII Qurultayında proqram xarakterli çıxışından irəli gələn vəzifələrin vaxtında və dolğun şəkildə vaxtında həyata keçirilməsini təmin etməkdir.
Müşavirəyə yekun vuran Laçın Rayon İcra Hakimiyyəti başçısı Aqil Nəzərli bu sahədə hər bir kəsin əzmlə çalışmalarını diqqətə çatdıraraq onlara işlərində uğurlar arzulamışdır.