Mürsəl İbrahimov Şuşada vətəndaş qəbulu keçirib

Səfərbərlik və Hərbi Xidmətə Çağırış üzrə Dövlət Xidmətinin rəisi, general-mayor Mürsəl İbrahimov oktyabrın 23-də Şuşa şəhərində vətəndaş qəbulu keçirib.

Qəbulda Şuşa, Xankəndi, Xocalı və Xocavənd şəhər və rayonlarında qeydiyyatda olan vətəndaşların müraciətləri dinlənilib.

Qəbuldan əvvəl ümummilli lider Heydər Əliyevin Şuşa şəhərindəki büstü ziyarət olunub, önünə gül dəstəsi qoyulub və xatirəsi ehtiramla yad edilib.

Vətəndaş qəbulu zamanı müraciətlərin əsas hissəsini Dövlət Xidmətində həqiqi hərbi xidmətə və ya işə qəbul, eləcə də övladlarının gələcək müddətli həqiqi hərbi xidmət keçəcəyi yerin müəyyənləşdirilməsi ilə bağlı məsələlər təşkil edib.

General-mayor Mürsəl İbrahimov hər bir vətəndaşın müraciətini diqqətlə dinləyib, qaldırılan məsələlərin hərtərəfli araşdırılması və qanunvericiliyin tələblərinə uyğun şəkildə həlli üçün müvafiq tapşırıqlar verib.

Qəbul zamanı vətəndaşların müraciətlərinin bir qismi yerindəcə həll edilib. Əlavə araşdırma tələb edən məsələlər nəzarətə götürülüb. Dövlət Xidmətinin səlahiyyətlərinə aid olmayan müraciətlərin isə aidiyyəti qurumlara yönləndirilməsi təmin edilib.

Bu cür vətəndaş qəbulları əhalinin müraciətlərinin birbaşa dinlənilməsi, mövcud problemlərin araşdırılması və qanunvericiliyə uyğun həlli baxımından mühüm əhəmiyyət daşıyır.

Səfərbərlik və Hərbi Xidmətə Çağırış üzrə Dövlət Xidməti tərəfindən keçirilən qəbul vətəndaşların müraciətlərinə baxılması, onların qaldırdıqları məsələlərin araşdırılması və aidiyyəti üzrə tədbirlərin görülməsi istiqamətində həyata keçirilən işlərin tərkib hissəsidir.