Bərdədə təhsil idarəsi ətrafında qalmaqallı iddia: Rəhbərə avtomobil hədiyyə edildiyi bildirilir

Qarabağ Regional Təhsil İdarəsi ətrafında sosial şəbəkələrdə ciddi müzakirələrə səbəb olan iddia yayılıb.

DuzXeber.az xəbər verir ki, yayılan məlumatlara əsasən, Qarabağ Regional Təhsil İdarəsinin tabeliyində fəaliyyət göstərən uşaq bağçalarının ərzaq təminatını həyata keçirən “Məişət” MMC-nin rəhbəri Nicat Cəfərovun idarənin müdiri Sənan Mənsimliyə “Changan Uni-Z” markalı avtomobil hədiyyə etdiyi iddia olunur.

Sosial şəbəkələrdə yayılan paylaşımda sözügedən avtomobilin fotosu da yer alıb. Məlumat ictimaiyyət arasında bir sıra suallar doğurub.

Əsas sual isə ondan ibarətdir ki, dövlət təhsil müəssisələrinin ərzaq təminatını həyata keçirən şirkətin rəhbəri ilə həmin sahəyə nəzarət edən qurumun rəhbəri arasında belə bir hədiyyə münasibəti olubmu?

Əgər iddia doğrudursa, avtomobilin hansı əsasla və hansı şəraitdə təqdim edildiyi, bu məsələnin tərəflər arasındakı kommersiya münasibətlərinə mümkün təsiri araşdırılmalıdır.

Qeyd edək ki, hazırda avtomobilin hədiyyə edilməsi ilə bağlı yayılan məlumatlar rəsmi şəkildə təsdiqlənməyib. Qarabağ Regional Təhsil İdarəsinin müdiri Sənan Mənsimlinin, “Məişət” MMC-nin rəhbəri Nicat Cəfərovun və Elm və Təhsil Nazirliyinin məsələ ilə bağlı mövqeyi ictimaiyyətə açıqlanmayıb.

Məsələ ilə bağlı aidiyyəti qurumların açıqlamasını dərc etməyə hazırıq.