Qubad İbadoğlunun məhkəməsi təxirə salınıb.

Nərimanov Rayon Məhkəməsində iqtisadçı-alim Qubad İbadoğlunun vəkillərlə telefon danışığına qoyulmuş qanunsuz məhdudiyyətin aradan qaldırılması üçün vəkillərin şikayəti ilə bağlı keçirilən məhkəmə təxirə salınıb. Bu barədə onun vəkili Zibeydə Sadıqova jurnalistlərə açıqlamasında deyib.

"Bizim şikayətimiz ondan ibarət idi ki, Qubad müəllim Bakı İstintaq təcridxanasında saxlanılır və ona vəkillərinə zəng etməyə şərait yaradılmır. Ona görə də, Pentensiar xidmət və Bakı İstintaq təcridxanasının hərəkətlərindən şikayət vermişdik. Bu eyni məzmunlu artıq ikinci şikayətimizdir. Hər dəfə hətta Qubad müəllim də rəhbərliyə rəsmi müraciət edib, amma ona vəkilinə zəng etməyə şərait yaradılmayıb. Məsələn, 7 gün qeyri- iş günü idi. O neçə dəfə istəyib ki, vəkillərinə zəng etsin şərait yaradılmayıb. Bu gün də məhkəmə keçirilmədi. Bizim şikayət etdiyimiz orqanların nümayəndələri gəlməmişdi, ona görə də onların iştirakının təmin olunması üçün proses növbəti həftənin 2-ci gününə təxirə salındı. Qubad müəllim özü də məhkəmədə iştirak edib. O özü israr edirdi ki, həmin orqanın nümayəndələri məhkəmədə iştirak etsin və biz məsələni başa düşək ki, nə üçün vəkilə zəng etməyə şərait yaradılmır. Qubad müəllimin səhhətində olan problemlər həmişə qalır. Ağrıyır, şəkəri, təzyiqi var. O qapalı şəraitdə saxlanılır. Onun ancaq təzyiqini yoxlayırlar", - vəkil açıqlamasında qeyd edib.

2024-cü il yanvarın 10-da Bakı Apellyasiya Məhkəməsi iqtisadçı-alim Qubad İbadoğlunun ev dustaqlığına buraxılması ilə bağlı vəsatətini təmin etməyib.

Ötən il Avqustun 25-də hazırda həbsdə olan Azərbaycan Demokratiya və Rifah Partiyasının sədri Qubad İbadoğluna qarşı Cinayət Məcəlləsinin 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.

İbadoğlu iyunun 23-ü Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılıb.

Qubad İbadoğlu barəsində Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham verilib və təqsirləndirilən şəxs qismində məsuliyyətə cəlb edilib.

Britaniyanın Azərbaycandakı Səfirliyi Azərbaycan hökumətini iyulun 23-də həbs olunan Azərbaycan Demokratik Partiyasının sədri Qubad İbadoğlunu dərmana və ədalətli hüquqi proses də daxil olmaqla insan hüquqlarına hörmət edilməsini təmin etməyə çağırıb. Bu çağırışa İngiltərə, Amerika, Almanya, Fransa da qoşulub.

London İqtisadiyyat və Siyasi Elmlər Məktəbi (LSE) də siyasətçinin həbs olunmasından narahatlığını ifadə edib.

anews.az