ABŞ-nin “Gerald R. Ford” aviadaşıyıcısı və onu müşayiət edən gəmilər Karib dənizindən Yaxın Şərqə göndəriləcək.

Xəbər verilir ki, bu barədə “The New York Times” (NYT) qəzeti mənbələrə istinadən məlumat yayıb.

Artıq gəmi ekipajının Fars körfəzində “Abraham Lincoln” aviadaşıyıcısının başçılıq etdiyi zərbə qrupuna qoşulacaqları barədə məlumatlandırıldığı bildirilir.

Qeyd edək ki, “Gerald R. Ford” ötən ilin iyun ayında Norfolk limanını (Virciniya ştatı) tərk edib və oktyabr ayında Karib dənizinə göndərilib.

Onu da xatırladaq ki, aviadaşıyıcı yanvarın 3-də ABŞ hərbi qüvvələrinin Venesuelanın paytaxtı Karakasda həyata keçirdiyi əməliyyatda iştirak edib. Əməliyyat nəticəsində Venesuelanın lideri Nikolas Maduro xanımı Siliya Floreslə birlikdə ələ keçirilərək Nyu-Yorka aparılıb.

Daha əvvəl ABŞ Hərbi Dəniz Qüvvələrinə məxsus nüvə enerjisi ilə işləyən “Abraham Linkoln” təyyarədaşıyan gəmisi Yaxın Şərqə göndərilmişdi. ABŞ Prezidenti Donald Tramp da İranın yaxınlığında böyük armadanın olduğunu təsdiqləmişdi.