Naxçıvan Muxtar Respublikasına İran İslam Respublikasının ərazisindən dron hücumlarının həyata keçirilməsi ilə bağlı məsələyə İran tərəfi qısa müddət ərzində aydınlıq gətirməlidir.

Xəbər verilir ki, bunu Milli Məclisin Gənclər və idman komitəsinin sədri Şahin İsmayılov deyib.

“Azərbaycan Respublikasının Xarici İşlər Nazirliyinin bəyanatında da qeyd olunduğu kimi, bu kimi halların gələcəkdə təkrarlanmaması üçün zəruri təxirəsalınmaz tədbirlər görülməlidir. Regionda gərginliyin artmasına xidmət edən bu kimi hallar qəbuledilməzdir”, - deyə komitə sədri bildirib.

Şahin İsmayılov qeyd edib ki, Azərbaycan ərazisinə qarşı bu cür hücum beynəlxalq hüququn norma və prinsiplərinin, xüsusilə də dövlətlərin suverenliyi və ərazi bütövlüyünə hörmət prinsiplərinin pozulması deməkdir. Ölkəmizin bu hadisəyə dərhal aydınlıq gətirilməsi, baş verənlərə izahat verilməsi ilə bağlı haqlı tələbi İran tərəfindən dərhal icra olunmalıdır.