Ortaq tarixə, mədəni irsə, eyni etnik kökə, dinə sahib olan Azərbaycan və Özbəkistan arasında münasibətlər son illər yüksələn xətlə inkişaf edir. İki ölkə arasında diplomatik münasibətlər 1995-ci il oktyabrın 2-də qurulub. Ölkələrimiz müstəqilliklərini bərpa etdikdən sonra - 1996-cı ilin ortalarında Azərbaycanın Özbəkistanda, 1998-ci ilin mayında isə Özbəkistanın Bakıda səfirlikləri fəaliyyətə başlayıb.


Son zamanlar dünyada cərəyan edən gərgin siyasi hadisələr fonunda Türk dövlətləri birliyinin önəmi artır. Buna nümunə olaraq Azərbaycan və Özbəkistan arasında əlaqələri göstərmək olar. Bu yaxınlarda Azərbaycan Prezidenti İlham Əliyevin Özbəkistana səfəri, ordada imzalanan sənədlər iki türk dövlətinin bir-birinə bağlılığını bir daha təsdiqlədi. Özbəkistan-Azərbaycan parlamentlərarası dostluq qrupunun rəhbəri Alişir Kadırov iki ölkə arasında əlaqələrdən və birgə hədəflərdən danışıb.


Onun sözlərinə görə, Azərbaycan və Özbəkistan əlaqələri digər Türk dövlətlərinə nümunə olacaq: "Azərbaycan və Özbəkistan Türk dünyası üçün çox vacib ölkələrdir. Prezident İlham Əliyevin Özbəkistana səfəri bizim üçün tarixi hadisədir. Ölkələrimiz arasında sabit əlaqələr digər Türk dövlətlərinə də nümunədir. Deyə bilərik ki, iki ölkə arasında əlaqələrin nəticəsi olaraq gələcəkdə çox uğurlu işlər görəcəyik. Bununla Özbəkistan və Azərbaycan arasında gələcəkdə iqtisadi və siyasi baxımdan birliyə şahid olacağıq. Bu birlik iki ölkənin gələcəyinə, Türk dünyasının inkişafına xidmət edir".



Qeyd edək ki, Azərbaycan Prezidenti İlham Əliyev iyunun 21-22-də Özbəkistanda rəsmi səfərdə olub. Səfər zamanı müxtəlif sahələr üzrə müzakirələr aparılıb, Özbəkistanla əlaqələrə yenidən nəzər salınıb.



Siyasi ekspert və politoloqların fikrincə, Prezidentin özbəkistanlı həmkarı Şavkat Mirziyoyevlə görüşü, imzalanan sənədlər və liderlərin səsləndirdiyi fikirlər iki ölkə münasibətlərində dərin köklərə dayanan yeni mərhələnin əsasının qoyulduğunu deməyə əsas verir. Həmçinin bildirilir ki, Azərbaycan liderinin iki illik pandemiya fasiləsindən sonra ilk dövlət səfərini Özbəkistana etməsi təsadüfi deyil və bu addım iki ölkənin dostluq, qardaşlıq münasibətlərindən irəli gəlir.