Tarixi qələbə - Zəfər bayramını laçınlılar təntənə ilə qeyd etdirlər
Laçın rayon İcra Hakimiyyətinin təşkilatçılığı ilə keçirilən tədbirdə Laçın Rayon İcra Hakimiyyətinin başçısı Aqil Nəzərli, rayonun hüquq-mühafizə orqanlarının rəhbərləri, şəhid ailələri, qazilər, veteranlar və çoxsaylı ictimaiyyət nümayəndələri iştirak edirdilər. Tədbirdən əvvəl 44 günlük Vətən müharibəsində qəhrəmancasına şəhid olmuş rayon sakini Əliyev Nihad Heydər oğlunun Azərbaycan Respublikasının Prezidenti Ali Baş Komandan cənab İlham Əliyevin müvafiq sərəncamı ilə təltif edildiyi 3-cü dərəcəli “Rəşadət” ordeni şəhidin atası Əliyev Heydər Əmiraslan oğluna təqdim olunaraq, onun keçdiyi şərəfli döyüş yolundan söhbət açılmışdır.
Sonra tədbir iştirakçıları Rayon İcra Hakimiyyətinin inzibati binası qarşısında ucaldılan Ümummilli lider Heydər Əliyevin büstünü, həmçinin qəsəbədəki Şəhidlərin Xatirə kompleksini ziyarət edərək hər iki abidə önünə tər güllər düzmüş, əziz xatirələrini ehtiramla yad etmişlər.
Bundan sonra tədbirin keçirildiyi ərazidəki Heydər Əliyev adına parka gələn iştirakçılar “Zəfər Bayramı məktəblilərin gözü ilə” adlı sərgiyə tamaşa etmişlər. Tədbir Azərbaycan Respublikasının ərazi bütövlüyü uğrunda canını fəda etmiş şəhidlərin xatirəsi bir dəqiqəlik sükut ilə yad olunaraq, Azərbaycan Respublikasının Dövlət Himninin səsləndirilməsi ilə başlandı. Rayon rəhbərliyi tədbir iştirakçılarını möhtəşəm Zəfər münasibəti ilə təbrik edərək, Azərbaycan Respublikası Prezidenti, Müzəffər Ali Baş Komandan cənab İlham Əliyevin rəhbərliyi ilə 44 günlük Vətən Müharibəsində rəşadətli ordumuz tərəfindən torpaqlarımızın yağı düşməndən azad edilməsi ilə xalqımıza yaşadılan möhtəşəm Zəfər Bayramının bu gün bütün Dünya Azərbaycanlıları tərəfindən təntənə ilə qeyd edildiyi xüsusi ilə vurğuladı.
Sonra rayonun özfəaliyyət kollektivlərinin ifasında Xalqımızın Möhtəşəm Qələbəsinə həsr olunmuş musiqi nömrələri həmçinin məktəblilərin ifasında şerlər səsləndirilmişdir.
Tədbir hər bir iştirakçıda xoş təəssürat və yüksək əhval ruhiyyə yaratmışdır.
