Muzey əməkdaşı Xocalı soyqırımına həsr edilmiş muzeydənkənar sərgi təşkil edib
21 fevral 2023-cü il tarixində Azərbaycan Dövlət Mədəniyyət və İncəsənət Universitetində (ADMİU) əlilliyi olan yaradıcı şəxslərin əl işlərindən ibarət “Qarabağ Duyğularımın Rəngi ilə” adlı sərgi təşkil olunub.
ADMİU, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi, Abşeron Rayon İcra Hakimiyyəti Yanında İctimai Şura və “İstedadlı Əlillər” İctimai Birliyinin üzvülərinin birgə təşkilatçılığı ilə keçirilən tədbir Xocalı soyqırımının 31-ci ildönümünə həsr olunub.
Tədbirdə universitet rəhbərliyi, millət vəkilləri, ictimaiyyət nümayəndələri, şəhid ailələri və jurnalistlər iştirak ediblər. Tədbiri giriş sözü ilə açan ADMİU-nun rektoru, professor Ceyran Mahmudova qonaqları salamlayıb, sərginin önəmindən danışıb. Xocalı soyqırımını xatırlayan rektor bu ümumxalq hüzn gününün hər il universitet daxilində müxtəlif tədbirlərlə anıldığını vurğulayıb. Rəhbəri olduğu ali təhsil ocağında Azərbaycanın tanınmış incəsənət və mədəniyyət xadimlərinin dərs dediyini və onların incəsənətimiz üçün peşəkar kadrlar hazırladığını deyən xanım rektor onların illər boyu Qarabağ probleminə və Vətən müharibəsinə həsr olunmuş bir çox tədbirlər, sərgilər keçirdiklərini, tamaşa və filmlər hazırladıqlarını diqqətə çatdırıb.
ƏƏSMN tabeliyində SXA ilə birgə əlilliyi olan yaradıcı şəxslərin sərgilərinin universitetdə davamlı olaraq keçirildiyini deyən rektor bu cür istedadlı şəxslərə dəstək olmağa hər zaman hazır olduqlarını vurğulayıb.
Millət vəkili Aqil Məmmədov belə bir tədbirə görə universitet rəhbərliyinə təşəkkür edib və “Əsrin faciəsi” olan Xocalı soyqırımından və Vətən müharibəsindən bəhs edib. A.Məmmədov Vətən müharibəsində qazanılan böyük zəfəri dövlətimizin gələcək böyük uğurlarının başlanğıcı adlandırıb.
Milli Məclisin sədr müavini, Gənclər və İdman komitəsinin sədri Adil Əliyev çıxışında Qarabağ zəfərindən geniş söz açıb, Ali Baş Komandan cənab İlham Əliyevin uğurlu siyasətindən danışıb. “İstedadlı Əlillər” İctimai Birliyinin sədri Qubad Qasımov, ƏƏSMN-nin Dövlət Məşğulluq Agentliyinin İdarə Heyətinin sədr müavini Cəmaləddin Quliyev, ƏƏSMN-nin tabeliyində SXA-nın rəhbərliyinin nümayəndəsi Fərhad Allahverdizadə, Abşeron Rayon İcra Hakimiyyəti Yanında İctimai Şuranın sədri, şəhid Elçin Həsənlinin anası Xatirə İsmayılova, Əlil Təşkilatları İttifaqının prezidenti Davud Rəhimli və başqa qonaqlar çıxış edərək 31-ci ildönümü yaxınlaşan Xocalı Soyqırımından bəhs edib, həmçinin, bu cür tədbirlərin əhəmiyyətindən danışıblar.
Tədbirin bədii hissəsində ADMİU-nun müəllimləri, Xalq artistləri - Gülyanaq Məmmədova, Teyyub Aslanov, Əməkdar artist Zakir Əliyev musiqi nömrələri ilə çıxış edib, ADMİU-nun tələbələrinin ifasında vətənpərvərlik mövzulu şeirlər dinlənilib.
Sonda qonaqlar “İstedadlı Əlillər” İctimai Birliyinin hazırladığı “Qarabağ duyğularımın rəngi ilə” adlı sərgi ilə yaxından tanış olublar.
Qeyd edək ki, sərgi Milli Azərbaycan Tarixi Muzeyinin İnnovasiyalar və təhsil proqramları şöbəsinin elmi işçisi Sahibə Ələkbərovanın təşəbbüsü və təşkilatçılığı ilə keçirilib. Xatırladaq ki, əlilliyi olan şəxslərin əl işlərindən ibarət sərgi artıq ikinci dəfədir ki, S. Ələkbərovanın təşəbbüsü ilə eyni məkanda baş tutur.
