Şəhid Tural Rəhimlinin anım tədbiri keçirilmişdir.
44 Günlük Vətən müharibəsində şəhidlik zirvəsinə ucalmış Rəhimli Tural Gəray oglunun anım mərasimi keçirilmişdir.
Tədbirdə iştirak edən YAP Laçın rayon təşkilatının sədri İlqar İlyasov, Laçın rayon İcra Hakimiyyəti Başçısının müavini Aynurə Həsənova , İctimaiyyət nümayəndələri şəhidin valideyinləri ilə birlikdə Qəhrəmanımızın məzarı üzərinə qərənfillər düzmüş, ruhuna dualar oxunmuş, keçdiyi döyüş yolundan, Müzəffər Ali Baş Komandanın rəhbərliyi ilə rəşadətli Ordumuzun qazandığı möhtəşəm qələbədən bəhs etmişlər.
Şəhidin Valideyinləri qazanılan qələbənin əsil təskinlik məlhəmi oldugunu vurğulayaraq, şəhid ailələrinə və qazilərə göstərilən dövlət qayğısına görə ölkə Prezidentinə minnətdarlıq və ehtiramlarını bildirmişlər.
Tural Gəray oğlu Rəhimli 27 oktyabr 2001-ci ildə Xırdalan şəhərində dünyaya göz açmışdı. Əslən Laçın rayonunun Korcabulaq kəndindən olan Tural 2007-ci ildə Xırdalan şəhərində yerləşən Laçın rayon 45 nömrəli tam orta məktəbin birinci sinfinə getmiş, 2018-ci ildə həmin məktəbin məzunu olmuşdur. Məktəb kollektivinin və sinif yoldaşlarının xatirəsində Vətən sevdalısı, Laçın aşiqi, bayrağa sonsuz sevgisi olan biri kimi qalmışdır.
28 oktyabr 2019-cu ildə həqiqi hərbi xidmətə yollanmışdı. Azərbaycan Ordusunun əsgəri olan Tural Rəhimli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə vuruşmuşdur. Tural Rəhimli sentyabrın 30-da Suqovuşan döyüşləri zamanı şəhid olmuşdur. Xocəsən qəsəbəsi qəbiristanlığı ərazisində yerləşən Vətən Müharibəsi Şəhidlərinin xiyaban kompleksində dəfn edilmişdir.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin Sərəncamına əsasən Tural Rəhimli ölümündən sonra "Vətən uğrunda" və "Suqovuşanın azad olunmasına görə" medalları ilə təltif edilmişdir.
