19 oktyabr tarixində Gürcüstanın paytaxtı Tbilisi şəhərində Qafqaz Kürdlərinin II Beynəlxalq Elmi-Praktiki Konfransı baş tutub. Konfrans «Ronahi» Gürcüstan Kürdləri Assosiasiyası, Qafqaz Kürd İnstitutu və Kürdüstan Diaspor Konfederasiyasının təşkilatçılığı, Bərzani Qərargahı və Knyaz İbrahim Mirzoyev Vəqfinin dəstəyi ilə baş tutub. 20-yə qədər ölkədən 60-dan çox alim, ekspert və tanınmış simaların iştirak etdiyi konfransda əsas mövzu «Milli quruculuqda Qafqaz kürdlərinin rolu» olub.



Konfransda bütün məruzələr dinlənilib, onların əksəriyyəti Qafqaz kürdlərinin milli, sosial-mədəni, hüquqi və digər məsələlərinə həsr olunub. Ümumilikdə ana dilinin qorunub saxlanılması və inkişaf etdirilməsinin yolları, çoxkonfessiyalı kürd cəmiyyətində tolerantlığın inkişaf zərurəti, müxtəlif ölkələrdə yaşayan kürdlər arasında münasibətlərin inkişafı kimi məsələlər müzakirə edilib.



Konfransda Cənubi Qafqaz kürdlərinin, eləcə də digər post-sovet respublikalarında yaşayan kürdlərin tarixi və hazırkı vəziyyəti müzakirə olunub. Mədəniyyət, incəsənət, təhsil, kommunikasiya, arxiv və milli hüquqlar sahəsində problemlərin həlli üçün xüsusi təkliflər və perspektivlər təqdim olunub. Süni intellekt başda olmaqla yeni texnologiyalardan istifadənin zərurəti vurğulanıb. Kürdlərin qonşu xalqlarla dostluq əlaqələrinin inkişafının möhkəmləndirilməsinin vacibliyindən ətraflı danışılıb. Konfransda kürdlərin ərazisində yaşadıqları dövlətlərlə Kürdüstan arasında mədəni, təhsil və iqtisadi əlaqələrin inkişaf etdirilməsində fəal iştirakının vacibliyinə də diqqət çəkilib. Gürcüstan və Kürdüstan televiziyaları konfransı aktiv şəkildə işıqlandırıb.



Konfransda Kürdüstan rəhbərliyindən Prezident Neçirvan Bərzaninin müşavirləri Xeyri Bozani və Hüseyn Qeydi, Baş nazir Məsrur Bərzaninin müşaviri Renas Cano iştirak edib. Azərbaycandan konfransa 3 nəfər nümayəndə - Bakı Beynəlxalq Multikulturalizm Mərkəzinin sədr müavini Ramin Qəmbərov, «Ronahi» Kürd Mədəniyyət Mərkəzinin sədri Zabit Məmmədov və Kürd Media Mərkəzinin təsisçisi İbrahim Əliyev qatılıb. Konfransın ötən ilki məruzələrin məcmusu kitab halında nəşr edilərək iştirakçılara təqdim olunub. Ötən il konfrans 15-16 avqust tarixlərində keçirilmişdi. Konfransın bundan sonra da ənənəvi şəkildə hər il keçirilməsi planlaşdırılır.

Tədbirdə Azərbaycanın Kürd İcmasını «Ronahi» Kürd Mədəniyyət Mərkəzinin sədri Zabit Məmmədov və Kürd Media Mərkəzinin təsisçisi İbrahim Əliyev təmsil edib. Hər iki təmsilçi konfransda kürdcə məruzə ilə çıxış edib.



Bakı Beynəlxalq Multikulturalizm Mərkəzinin sədr müavini Ramin Qəmbərov da konfransda iştirak edib.