Səngəçal qəsəbəsində yollar bərbad vəziyyətdədir: Sakinlərin müraciətləri niyə nəticəsiz qalır?

Kanal15.tv-yə müraciət edən sakinlər yolların acınacaqlı vəziyyətindən narazıdırlar. Aidiyyəti qurumlar nə zaman hərəkətə keçəcək?

Qaradağ rayonunun Səngəçal qəsəbəsində yolların bərbad vəziyyətdə olması sakinlərin ciddi narazılığına səbəb olub.

Kanal15.tv-yə müraciət edən qəsəbə sakinlərinin təqdim etdikləri görüntülərdə yolların palçıq içində olduğu, ərazidə hərəkətin çətinləşdiyi görünür. Xüsusilə yağışlı havalarda yolun bu vəziyyətdə olması sakinlər üçün əlavə çətinliklər yaradır.

Sakinlərin bildirdiyinə görə, qəsəbədə mövcud problemlər illərdir davam edir. Onlar dəfələrlə aidiyyəti qurumlara müraciət etdiklərini, məsələ ilə bağlı çəkilişlər aparılaraq ictimailəşdirildiyini, lakin indiyədək problemin həllini tapmadığını deyirlər.

Bəs sakinlərin müraciətləri niyə nəticəsiz qalır? Qəsəbənin yollarının təmiri üçün nə zaman konkret addımlar atılacaq? İnsanlar daha nə qədər bu şəraitdə yaşamalıdırlar?

Sakinlər, həmçinin şəhid ailələrinin, qazilərin və müharibə veteranlarının problemlərinə diqqət ayrılmasını, onların müraciətlərinin həssaslıqla araşdırılmasını istəyirlər.

Kanal15.tv olaraq Qaradağ Rayon İcra Hakimiyyətini və aidiyyəti qurumları Səngəçal qəsəbəsindəki vəziyyətə diqqət yetirməyə, yolların təmiri və infrastruktur problemlərinin aradan qaldırılması istiqamətində zəruri tədbirlər görməyə çağırırıq.

Ümid edirik ki, sakinlərin bu müraciəti diqqətdən kənarda qalmayacaq və problemin həlli üçün müvafiq addımlar atılacaq.

Qarşı tərəfin mövqeyini dərc etməyə hazırıq.