Səngəçal qəsəbəsində yeni park salınır.

Qəsəbənin simasının daha da gözəlləşməsi və müasirləşməsi, əhalinin rahatlığının təmin edilməsi istiqamətində Qaradağ rayon İcra Hakimiyyəti tərəfindən davamlı olaraq abadlıq-quruculuq işləri aparılır, yaşıllıq sahələri, abad məhəllələr, yeni parklar salınır. Görülən işlər çərçivəsində Səngəçal qəsəbəsində yeni, müasir standartlara cavab verən istirahət və əyləncə parkının inşasına başlanılıb.

Artıq ərazidə təmizlik işləri aparılıb, insanların rahat gediş-gəlişini təmin etmək üçün hərəkət hissələrinə səki daşlarının döşənməsinə başlanılıb.

Yeni salınan parkda uşaq oyun-əyləncə meydançaları, oturacaq və söhbətgahlar, idman meydançası və idman qurğularının quraşdırılması nəzərdə tutulur.
Həmçinin, yaşayış binalarının fasadlarının rənglənməsi, yaşıllıqların suvarılması üçün yeni su xətlərinin çəkilməsi, parkın ən müasir işıqlandırma sistemləri ilə təchiz olunması, bütün yaş qruplarına aid vətəndaşlar nəzərə alınaraq onlar üçün xüsusi guşələrin yaradılması həyata keçiriləcək.

Parkda yaşıllıq zolaqları və qazon örtüyü salınacaq, o cümlədən müxtəlif növ ağaclar, yeni dekorativ gül-çiçək kolları əkiləcək.

Həmçinin, aparılan abadlıq-quruculuq işləri çərçivəsində qəsəbə boyunca avtomobil yollarının asfaltlanması da həyata keçirilir.

Hazırda asfalt örtüyünün çəkilməsi sürətlə davam etdirilir.