Milli Qurtuluş Günü bizim şərəf tariximizdir
Hər bir xalqın tarixi, gələcəyi üçün olduqca vacib, həlledici günlər olur. 15 İyun 1993-cü il tarixi hər bir azərbaycan vətəndaşın iftixarla xatırlayacağı, ölkəmizin təhlükəsindən xilas olduğu bir gündür. Düz 29 il əvvəl - 1993-cü ilin iyununda Azərbaycan "olum, ya ölüm" dilemması qarşısında qalmışdı.
Müstəqilliyin ilk illərindən başlayaraq, ölkədə özbaşınalıq hökm sürürdü, orduda vəziyyət dözülməz dərəcədə ağır idi. Erməni təcavüzü günü-gündən genişlənirdi. Azərbaycanda isə hakimiyyət böhranı hökm sürürdü. Gərgin siyasi vəziyyət, əhalinin sosial durumunun getdikcə ağırlaşması, ölkənin parçalanmaq və müstəqilliyini itirmək təhlükəsilə üzləşməsi fonunda dövləti bu bəlalardan xilas edə biləcək, xalqı öz arxasınca aparmağa qadir liderə ehtiyac duyulurdu.
Azərbaycan xalqı yenicə müstəqillik qazanmış ölkəni düşdüyü ağır və dözülməz vəziyyətdən çıxarmağa qadir olan yeganə şəxsiyyətin Ümummilli Lider Heydər Əliyev olduğunu başa düşürdü. O zaman xalqın təkidli tələbi ilə hakimiyyətə qayıdan Ulu Öndər Heydər Əliyev iyunun 15-də Azərbaycan Ali Sovetinin sədri seçildi. Bununla da ölkədə uzun illər davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu.
1993-cü il oktyabrın 3-də ölkəmizdə keçirilən prezident seçkilərində xalqımızın böyük əksəriyyətinin etimadını qazandıqdan sonra Azərbaycan üzləşdiyi bütün problemləri dəf etməyə başladı, bütün sahələrdə sistematik və davamlı islahatlar həyata keçirildi.
Dövlətimizin və xalqımızın inkişafını, intibahını, rifah halının daha da yaxşılaşdırılmasını nəzərdə tutan islahatlar milli maraqlarımızın həyata keçirilməsinin əsasını qoydu. İqtisadiyyatımızın inkişafı, ölkədəki ictimai-siyasi sabitliyin bərqərar edilməsi, Ermənistanla atəşkəsin imzalanması ilə günahsız insanların ölümünün və daha çox torpaqlarımızın itirilməsinin qarşısı qətiyyətlə və uzaqgörənliklə alındı. Sağlam təməllər üzərində qurulan bu inkişaf strategiyası Azərbaycanın haqlı mövqeyinin dünyaya çatdırılamsı işində əvəzsiz rol oynadı.
Azərbaycanın müasir inkişafı şübhəsiz ki, Milli Qurtuluş Günü ilə əlaqədardır. Təsadüfi deyil ki, hər ilin 15 iyun günü ölkəmizdə rəsmi dövlət bayramı kimi qeyd edilir. Bu tarix dövlətimizin və xalqımızın taleyinə qızıl hərflərlə yazılıb. Bu tarix heç bir zaman unudulmayacaq və əsl qurtuluş, tərəqqi günü kimi tariximizə əbədi yazılacaq.
Ölkəmiz Dahi Şəxsiyyət Heydər Əliyev yolu ilə daha inamla və qətiyyətlə addımlayır, irəliləyir. Bu gün dövlətimizə Ümumilli Lider Heydər Əliyevin layıqlı davamçısı,Azərbaycan Prezidenti İlham Əliyev cənablarının rəhbərlik etməsi hər bir cəmiyyətin və dövlətin davamlı inkişafı üçün həyati əhəmiyyət daşıyan məsuliyyətli və səriştəli idarəçilik amilini təmin edir.
2020-ci il sentyabrın 27-də mənfur Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq Azərbaycanın şanlı Ordusu sonradan “Dəmir yumruq” adlandırılan əks-hücum əməliyyatına başladı. 44 gün davam edən Vətən müharibəsi təxminən otuz illik işğala son qoyulması və ərazi bütövlüyümüzün bərpası ilə nəticələndi. Müzəffər Ali Baş Komandan İlham Əliyevin rəhbərliyi ilə qazanılmış möhtəşəm Zəfər tariximizə qızıl hərflərlə yazıldı.
Artıq Azərbaycan dövlətinin müasir dövrün tələbləri səviyyəsində qurulmuş sosial-iqtisadi inkişaf strategiyası xalqımızın gələcəyindən əmin olmağa imkan verir. Ulu Öndər Heydər Əliyevin səyləri ilə yaradılmış inkişaf dinamikası qorunub saxlanılmalı, dövlətimizin siyasi, iqtisadi və hərbi qüdrəti artır, xalqımızın rifah halı yüksəlir.
Bəhruz Ramazanov-YAP Qusar rayon təşkilatının əməkdaşı.
