Bu gün Azərbaycan Milli Elmlər Akademiyasının (AMEA) yeni prezidenti məlum olub. Akademik İsa Həbibbəyli AMEA-nın yeni prezidenti seçilib.



Dovletinfo.az bildirir ki, İsa Həbibbəyli 16 oktyabr 1949-cu ildə Şərur rayonunun Danzik kəndində anadan olub.



O, Azərbaycan Dövlət Pedaqoji İnstitutunun Naxçıvan filialının dil-ədəbiyyat fakültəsini fərqlənmə diplomu ilə bitirib.



1971-ci ildən Şərur rayonunda kənd orta məktəbində müəllim işləyib. Bundan sonra 1975-ci ildən Naxçıvan Dövlət Universitetində müəllim, dosent, elmi işlər üzrə prorektor, 1996-cı ildən 2013-cü ilə qədər isə Naxçıvan Dövlət Universitetinin rektoru vəzifələrində çalışıb.



İsa Həbibbəylinin AMEA ilə yollarının kəsişməsi 2013-cü ilə təsadüf edib. O, həmin ilin aprel ayında Azərbaycan Milli Elmlər Akademiyasının vitse-prezidenti seçilib və bu günədək həmin vəzifədə qalıb.



İsa Həbibbəyli, eyni zamanda Naxçıvan Muxtar Respublikası Ali Məclisinin deputatı olub.



III, IV və V çağırış Azərbaycan Milli Məclisinin deputatı seçilib. Hazırda VI çağırış parlamentin deputat mandatına sahibdir.



AMEA-nın yeni prezidenti 89 kitabın, 1428 məqalənin, 212 xaricdə çap olunmuş elmi məqalənin müəllifidir. 29 elmlər namizədi və 4 elmlər doktorunun elmi rəhbəri olub.



İsa Həbibbəyli filologiya elmləri doktoru və professordur. O, 1996-cı ildən Yeni Azərbaycan Partiyasının üzvüdür.



İndiyədək bir çox mükafatlara layiq görülüb. Ölkə başçısı tərəfindən "Şöhrət" və "Şərəf" ordenləri ilə təltif olunub.



Qeyd edək ki, AMEA-nın bundan öncə prezidenti Ramiz Mehdiyev olub. O, cari ilin fevralında vəzifəsindən istefa verib. Ramiz Mehdiyevin istefasından sonra AMEA-nın strukturunda dəyişiklik edilib.



Prezident İlham Əliyevin bu ilin iyul ayında imzaladığı sərəncamla AMEA-nın bəzi müəssisələri Elm və Təhsil Nazirliyinin tabeliyinə verilib.