Ölkəmizin ərazi bütövlüyü uğrunda savaşan qəhrəmanlarımızdan biri Xosrovzadə İlkin Azad oğlunun şəhid olduğu gündür.
Şəhid Xosrovzadə İlkinin məzarını anım günündə ziyarət etdik, ruhuna dualar oxuduq. Ailəsinə dərin hüznlə başsağlığı verirəm. Allah şəhidlərimizə rəhmət eləsin.
Kiçik gizir Xosrovzadə İlkin Azay oğlu 1 dekabr 1997-ci ildə Abşeron rayonunun Ceyranbatan qəsəbəsində anadan olub, Laçın rayonunun Qoşasu kəndindəndir.
O, müddətli həqiqi hərbi xidmətini başa vurduqdan sonra Dövlət Sərhəd Xidmətində müddətdən artıq həqiqi hərbi xidmətə qəbul olunub.
Qəhrəmanımız Vətən müharibəsi başlayanda İlkin Dövlət Sərhəd Xidmətinin Çevik Hərəkət Qüvvələrinin Çevik Hərəkət Briqadasında istehkamçı-minaaxtaran vəzifəsində xidmət edib. O, Zəngilan şəhəri və ətraf ərazilərin, İran İslam Respublikası ilə dövlət sərhədinin işğaldan azad olunmasında rəşadət göstərib. Oktyabrın 25-də Zəngilan rayonu ərazisində gedən döyüşlərdə başından aldığı qəlpə yarasından şəhid olub.
Kiçik gizir Xosrovzadə İlkin Azay oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən 3-cü dərəcəli “Vətənə xidmətə görə” ordeni, “Vətən uğrunda”və “Zəngilanın azad olunmasına görə” medalları ilə təltif olunub.