“2023-cü ili Azərbaycan xalqının həyatında əhəmiyyətli il kimi qiymətləndirmək lazımdır. 2020-ci ildə 44 günlük Vətən müharibəsi ilə başlanan Zəfər salnaməmiz 2023-cü ilə daha da zənginləşdi”.

Bu fikirləri açıqlamasında Milli Məclisin deputatı Aqil Məmmədov 2023-cü ili dəyərləndirərkən söyləyib.

Millət vəkili bildirib ki, yola saldığımız ildə Azərbaycan Respublikası özünün tam ərazi bütövlüyünə və tam suverenliyinə qovuşdu: “2023 Zəfər salnaməmizə yazılacaq daha bir il kimi tarixə düşdü. Ali Baş Komandan Xankəndində Azərbaycan bayrağını dalğalandırdı. Azərbaycan xalqı, gələcək nəsillərimiz bu mənada, 2023-cü ili hər zaman xoş duyğularla, fəxrlə xatırlayacaqlar”.

A.Məmmədovun sözlərinə görə 2023-cü il bir sıra əlamətdar hadisələrlə yadda qalıb: “Bu il Azərbaycan xalqı Ulu öndər Heydər Əliyevin 100 illiyini qeyd etdi. Ulu öndər tərəfindən müəyyən edilən siyasət Azərbaycan xalqını tərəqqiyə, inkişafa apardı və ərazi bütövlüyünün, suverenliyin təmin edilməsi ilə nəticələndi. Digər bir mühüm hadisə isə cənab İlham Əliyevin Prezident seçilməsinin 20 illiyi ilə bağlı idi. Azərbaycan xalqı onu Zəfərə çatdıran müzəffər Ali Baş Komandanın 20 illik prezidentliyini yüksək qiymətləndirir. Biz inanırıq ki, bu yüksək xalq etimadı 7 fevralda keçiriləcək növbədənkənar prezident seçkilərində öz əksini tapacaq, xalqımız yekdilliklə öz liderinə səs verəcək”.

Hazırda işğaldan azad edilmiş bölgələrdə sürətlə quruculuq işlərinin aparıldığını vurğulayan MM-in deputatı qeyd edib ki, artıq Böyük Qayıdış prosesi başlayıb: “Bu proses qarşıdakı ildə daha böyük sürətlə davam edəcək. 30 il yurd-yuvasından didərgin düşmüş həmvətənlərimiz növbəti yeni illəri öz doğma yerlərində qarşılayacaqlar”.