Türkiyə-Azərbaycan Birgə İqtisadi Komissiyasının toplantısı keçirilir
Məlumata görə, toplantıya Türkiyə tərəfdən Türkiyə Respublikasının vitse-prezidenti Cevdet Yılmaz, Azərbaycan tərəfdən isə Baş nazir Əli Əsədov həmsədrlik edəcək. İkitərəfli və nümayəndə heyətləri arasında aparılacaq görüşlərdə iki ölkə prezidentləri tərəfindən müəyyən edilən 15 milyard ABŞ dolları həcmində ticarət dövriyyəsi hədəfinə çatmaq üçün atılacaq addımlar, eləcə də ticarətin asanlaşdırılmasına dair məsələlərin müzakirəsi gözlənilir.
Proqram çərçivəsində iqtisadi əlaqələrin daha da dərinləşdirilməsi, işgüzar dairələrin bir araya gətirilməsi və birgə investisiya imkanlarının inkişaf etdirilməsi məqsədilə II Türkiyə–Azərbaycan İnvestisiya Forumu da təşkil olunacaq. Forumda Türkiyədən vitse-prezident Cevdet Yılmaz və ticarət naziri Ömər Bolatın, Azərbaycandan isə Baş nazir Əli Əsədov və iqtisadiyyat naziri Mikayıl Cabbarovun iştirakı planlaşdırılır. Eyni zamanda, MÜSİAD Azərbaycan Baş Assambleyası çərçivəsində türk və azərbaycanlı iş adamları ilə görüşlərin keçirilməsi nəzərdə tutulur.
Vitse-prezident Cevdet Yılmazın Bakı səfəri çərçivəsində Azərbaycan Milli Məclisinin sədri Sahibə Qafarova ilə də görüş keçirməsi gözlənilir.
Türkiyə uzun illərdir Azərbaycanın əsas ticarət tərəfdaşlarından biri hesab olunur. 2024-cü ildə Türkiyənin Azərbaycana ixracı 3,1 milyard ABŞ dolları, Azərbaycandan idxalı isə 4,8 milyard ABŞ dolları təşkil edib. Türkiyə Azərbaycanın ixrac etdiyi ölkələr arasında ikinci, idxalında isə üçüncü yerdə qərarlaşıb.
Azərbaycandakı türk investisiyalarının həcmi təxminən 18 milyard ABŞ dolları, Türkiyədəki Azərbaycan investisiyaları isə təqribən 21 milyard ABŞ dolları səviyyəsindədir. Azərbaycanda təxminən 7 min türk kapitallı şirkət fəaliyyət göstərir, Türkiyədə isə Azərbaycan kapitallı 3 min 100-ə yaxın şirkət mövcuddur. Türk podratçı şirkətləri bu günədək Azərbaycanda ümumi dəyəri 21,1 milyard ABŞ dolları olan 558 layihə həyata keçiriblər.
KEK-in 12-ci Dövr Toplantısı çərçivəsində imzalanması planlaşdırılan KEK Protokolu və Fəaliyyət Planı ilə ticarət, enerji, nəqliyyat, səhiyyə, təhsil və mədəniyyət daxil olmaqla bir çox sahədə Türkiyə–Azərbaycan iqtisadi və ticarət əlaqələrinin yol xəritəsinin müəyyənləşdirilməsi hədəflənir. Keçiriləcək İnvestisiya Forumunun isə iki ölkənin işgüzar dairələri arasında əlaqələri gücləndirməsi və regional iqtisadi əməkdaşlığa töhfə verməsi gözlənilir.
Serdar Şengül
