Rasim Əliquliyev: "IV Sənaye İnqilabı texnoloji cəmiyyət qurmaq tələb edir""IV Sənaye İnqilabının yaratdığı yeniliklər texnoloji cəmiyyətin qurulmasını tələb edir".

"xebernur.com " xəbər verir ki, bunu Azərbaycan Milli Elmlər Akademiyasının (AMEA) vitse-prezidenti, informasiya Texnologiyaları İnstitutunun baş direktoru Rasim Əliquliyev bildirib.

Onun fikrincə, informasiya-kommunasiya texnologiyalarının (İKT) tətbiqi ilə cəmiyyətin bir çox sahələrində yenilənmələr, rəqəmsal transformasiyalar baş verib və bu gün İKT vasitəsilə biliyin vizullaşdırılması onu asan qavramağa imkan verir.

Kompüter modelləşməsi və vizuallaşmasının bilik sahələrində yeni kontentə tətbiqinin böyük bir inqilabi proses olduğuna diqqət çəkən akademik R.Əliquliyev XXI əsrin təhsil sisteminin ən böyük paradiqmasının məhz həmin çağırışlar üzərində qurulduğunu vurğulayıb, əlavə edib ki, dövlət qurumları tədrisin təkmilləşdirilməsi prosesində yaxından iştirak etməli, dərslərin məzmununda inqilabi dəyişikliklərin aparılmasına, onun beynəlxalq tələblərə uyğunlaşdırılmasına dəstək verməlidir.

Akademikin sözlərinə görə, İnformasiya Texnologiyaları İnstitutu İKT-nin digər sahələrə transfer və tətbiqində maraqlıdır, bu istiqamətdə multidissiplinar biliklərə əsaslanan kadrların hazırlanmasına dəstək verməyə hazırdır: "Hesab edirəm ki, vətəndaşları müasir reallıqlara hazırlamaq, yeni nəsil insan yetişdirmək, təhsilin qarşısında yeni paradiqmaların ortaya çıxması və müasir texnologiyaların tətbiqi ilə təhsilin məzmununun qeyd olunan tələblərə uyğunlaşdırılması istiqamətində pedaqoji fəaliyyətlə məşğul olan qurumlar və AMEA-nın müvafiq institutları birgə fəaliyyət göstərməlidir".