Qarabağ qazisi Bəxtiyar Məmmədli: “Bu nə ədalətsizlikdir? Müharibə əlili illərlə qapı-qapı düşməlidir?”

Qarabağ müharibəsi qazisi Bəxtiyar Məmmədli ölkədə müharibə əlillərinə münasibətlə bağlı ciddi narazılığını ifadə edib. O, bildirib ki, dəfələrlə Prezident Administrasiyasına müraciət etməsinə baxmayaraq, problemi hələ də həll olunmayıb.
Qazinin sözlərinə görə, artıq 20 dəfədən çox PA qəbuluna gedib-gəlib, lakin hər dəfə süründürməçilik, əsassız imtinalar və köhnə SSR qanunları ilə “dolandırılma” ilə üzləşib.
“7 il daimi qeydiyyat şərti qoymusunuz ki, guya müharibə əlili və şəhid ailəsi mənzil alsın. Amma Sosial Xidmətlər Agentliyinin apardığı siyasət sizin dediklərinizlə üst-üstə düşmür. Bu nə ədalətdir?” – deyə o, narazılığını bildirib.
Bəxtiyar Məmmədli xüsusilə Binəqədi Rayon İcra Hakimiyyətinin fəaliyyətindən şikayət edərək qeyd edib ki, hara müraciət edirsə, məsuliyyət bir qurumdan digərinin üzərinə atılır:
“Bu ölkədə bir məsul qurum varmı? Müharibə əlili illərlə qapı-qapı gəzəcək? Qanunlar sadəcə kağız üzərində qalacaq?”
Qazi sonda vurğulayıb ki, o, heç kimdən nəsə xahiş etmir, sadəcə qanunla ona düşən haqqını tələb edir:
“Ölkənin yiyəsi yoxdurmu? Bəsdirin artıq. Mən dilənmirəm, qanuni haqqımı tələb edirəm.”