Qazi haqsızlıqdan danışdı: “Dövlət üçün döyüşdüm, amma haqlarım tapdanır”

Azərbaycan Respublikasının Prezidenti Cənab İlham Əliyevə açıq müraciət edən müharibə iştirakçısı və əlil Məmmədli Bəxtiyar Saleh oğlu mənzil imtiyazı ilə bağlı illərdir həllini tapmayan probleminə diqqət çəkib.

Qazi bildirib ki, Prezident Administrasiyasından Binəqədi Rayon İcra Hakimiyyətinə məsələ ilə bağlı tapşırıq verilsə də, icra mərhələsində laqeydlik və subyektiv yanaşma müşahidə olunur:

“Mən Azərbaycan əsgəri kimi bu dövlətin ərazi bütövlüyü və təhlükəsizliyi uğrunda canımı fəda etməyə hazır olmuşam. Amma indi sadəcə mənzil hüququmla bağlı illərlə sürən haqsızlıqla üzləşirəm. Keçmiş sovet dövrünün qərarlarına istinad edib, mənə imtina cavabı verirlər. Halbuki həmin sənədlər çoxdan hüquqi qüvvəsini itirib.”

Bəxtiyar Məmmədli müraciətində Prezidentdən şəxsi nəzarət və obyektiv araşdırma tələb edib:
“Mənim kimi sadə döyüşçülərin haqlı tələblərinin təmin olunması dövlətimizin ədalət prinsipinə və Sizin qazilərə olan diqqətinizə tam uyğundur.”

Qazi hesab edir ki, aidiyyəti qurumlar məsuliyyətdən yayınmamalı, şəhid ailələri və qazilərlə bağlı məsələlərdə ədalət bərpa olunmalıdır.