Şəhid ailəsi və Qarabağ veteranı Prezidentə müraciət etdi

Cəlilabad rayon sakini, Qarabağ müharibəsi veteranı və şəhid ailəsinin üzvü Qamət İsmayılov Azərbaycan Respublikasının Prezidenti, Ali Baş Komandan İlham Əliyevə müraciət edib.

İsmayılov Qamət Əcəbəli oğlu müraciətində bildirir ki, 2000–2001-ci illərdə Daxili Qoşunlarda xidmət zamanı müxtəlif əməliyyatlarda iştirak edib, kəllə-beyin travması və digər xəsarətlər alsa da, aldığı zədələr rəsmi şəkildə sənədləşdirilməyib.

Veteran qeyd edir ki, hospitalda müalicə olunduğu dövrdə lazımi arayışlar ona təqdim edilməyib, rüşvət tələb olunduğu üçün haqqı olan sənədləri ala bilməyib. Nəticədə bu günə qədər hərbi əlil kimi tanınmayıb və mülki əlil statusu ilə kifayətlənməli olub.

Müraciət müəllifi deyir ki, ailəsi ilə birlikdə çətin vəziyyətdə yaşayır:

“Mən ailəliyəm, iki övlad atasıyam və hazırda kirayədə qalıram. Mənim haqqım olan hərbi əlil statusu tanınmır, prezident təqaüdü və mənzil hüququm təmin edilmir. Halbuki mən dövlətim uğrunda sağlamlığımı qurban vermişəm”, – deyə Qamət İsmayılov qeyd edib.

O, dəfələrlə aidiyyəti dövlət qurumlarına müraciət etsə də, problemlərinin həll olunmadığını bildirir. Onun sözlərinə görə, süründürməçilik və məmur özbaşınalığı səbəbindən haqları tapdanır.

Müraciətində Prezidentə sədaqətini vurğulayan veteran bildirib ki, problemin həll olunmaması halında YAP sıralarından çıxmaq və hətta ailəsi ilə birlikdə ölkədən köçmək məcburiyyətində qala bilər.

Qamət İsmayılov dövlət başçısından xahiş edir ki, hərbi xidmət dövründə aldığı xəsarətlərin təsdiqi üçün müvafiq göstərişlər verilsin, hərbi əlil statusu rəsmiləşdirilsin, ailəsinin sosial problemlərinin həlli üçün tədbirlər görülsün və rüşvət tələb edən məmurlara qarşı ciddi ölçülər götürülsün.