Bu gün Lerik rayonunda 44 günlük Vətən müharibəsində qəhrəmanlıqlar göstərərək şəhidlik zirvəsinə ucalmış şəhid kiçik gizir Əsədullayev Elnur İmran oğlunun doğum günü xatirəsi anılıb.
Tədbirdə Lerik Rayon İcra Hakimiyyəti başçısının səlahiyyətlərini icra edən Cəlil Baxşiyev, Yeni Azərbaycan Partiyası Lerik rayon təşkilatının sədri Malik Mirzəyev, hüquq-mühafizə orqanları,ictimaiyyət nümayəndələri,şəhid ailələ üzvləri şəhidimizin məzarını ziyarət edib, məzarı önünə gül-çiçək dəstələri düzərək, əziz xatirəsini ehtiramla yad ediblər.
Qeyd edək ki, Elnur İmran oğlu Əsədullayev 13 iyun 1998-ci ildə Lerik şəhərində anadan olub. 18 yanvar 2018-ci ildə hərbi xidmətini başa vuran Elnur evinə qayıdır. 15 iyun 2018-ci ildə könüllü olaraq Vətənə xidmət etməyə gedir və Beyləqan rayonunun "N" saylı hərbi hissəsində manqa komandiri vəzifəsində xidmət etməyə başlayır. Kiçik gizir Elnur xidmətində fərqləndiyinə görə manqa komandiri vəzifəsindən tank komandiri vəzifəsinə yüksəlir.
27 sentyabr 2020-ci il tarixindən etibarən başlayan II Qarabağ mühribəsində fəal iştirak edərək düşmənə sarsıdıcı zərbələr endirərək düşmənin xeyli sayda canlı qüvvəsini məhv edən Elnur oktyabr ayının 30-da Füzuli istiqamətində gedən şiddətli döyüşlərdə qəhrəmancasına şəhidlik məqamına yüksəlir.
Şəhid kiçik gizir Əsədullayev Elnur İmran oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən 3-cü dərəcəli "Vətənə xidmətə görə", "Füzulinin azad olumasına görə", "İgidliyə görə" və "Vətən uğrunda" medalları ilə təltif edilib.
Allah bütün şəhidlərimizə rəhmət eləsin!