Şəhid İlyasov Fərid İbad oğlunun anım mərasimi keçirilib

Torpaqlarımızın işğaldan azad olunması, ərazi bütövlüyümüzün bərpası uğrunda gedən döyüşlərdə qəhrəmancasına şəhid olan İlyasov Fərid İbad oğlunun anım mərasimi keçirilib.
Tədbirdə YAP Laçın rayon təşkilatının sədri İlqar İlyasov, Laçın Rayon İcra Hakimiyyəti Başçısının müavini Aynurə Həsənova,şəhidin ailə üzvüləri,ictimaiyyət nümayəndələri iştirak ediblər.
Fərid İlyasov 20 iyul 1999-cu ildə doğulub.
Əslən Laçın rayonunun Hacılar kəndindən olan xüsusi təyinatlımız Qarabağ torpağında düşmənə sarsıdıcı zərbələr vurub.
2006-cı ildə Laçın rayon Sadınlar kənd tam orta məktəbin 1-ci sinfinə gedib 2010-cu ildə təhsilini Binəqədi rayonunun 28 May qəsəbəsində yerləşən 306 saylı tam orta məktəbdə davam etdirib. Tam orta təhsilini 2016-cı ildə bitirən Fərid 2017-ci ilin iyulunda Laçın Rayon Hərbi Komissarlığı tərəfindən hərbi xidmətə çağırılıb.
Beyləqan ərazisində yerləşən "N"saylı hərbi hissəsində əsgər olub və 2018-ci ilin yanvarında hərbi xidmətini başa vurub. Fərid hərbi xidmətdən döndükdən sonra saç ustası işləyib.
Naxçıvan Xüsusi Təyinatlı Dəstədə xidmətə başlayan Fərid 2 ildən çox idi ki,xidmət edirdi. 2020-ci ilin sentyabrında başlayan Vətən Müharibəsinin 12-ci günündə Naxçıvandan Qarabağa döyüşə aparılıb.
F.İlyasov 2020-ci il oktyabrın 30-da şəhidlik zirvəsinə ucalıb.
Bakı şəhərindəki İkinci Fəxri Xiyabanda dəfn edilib.
Fərid xüsusi təyinatlılarda xidmət etdiyi müddətdə fəxri fərmanlar və fərqləndirmələrlə təltif olunub.
Fərid İlyasov ölümündən sonra Azərbaycan Respublikasının Prezidenti, Ali Baş Komandan İlham Əliyevin Sərəncamı ilə "Vətən uğrunda" , "Hərbi xidmətdə fərqlənməyə görə" , "Şuşanın azad edilməsinə görə" və "İgirdliyə görə" orden və medalları ilə təltif olunub.