30 oktyabr 2023-cü il tarixində Şəhid Leytenant Qənimətov Ətraf Oktay oğlunun anım mərasimi keçirilib
Torpaqlarımızın işğaldan azad olunması, ərazi bütövlüyümüzün bərpası uğrunda gedən döyüşlərdə qəhrəmancasına şəhid olan Leytenant Qənimətov Ətraf Oktay oğlunun anım mərasimi keçirilib.
Tədbirdə Yeni Azərbaycan Partiyası Laçın rayon təşkilatının sədri İlqar İlyasov, Yeni Azərbaycan Partiyası Şəki rayon təşkilatının sədri Daşqın Mikayılov, Laçın rayon və Şəki Şəhər İcra Hakimiyyətinin məsul şəxsləri, şəhidin ailə üzvüləri və ictimaiyyət nümayəndələri iştirak ediblər.
Əslən Laçın rayonu Vəlibəyli kəndindən olan Qənimətov Ətraf Oktay oğlu 1997-ci ilin martın 20-də Şəki rayonu, Dəmiryol köçkün qəsəbəsində anadan olub. 2003-cü il Şəki şəhər Çələbixan qəsəbəsində məcburi köçkünlər üçün tikilən Laçın rayon M.A.Süleymanov adına Kaha kənd tam orta məktəbinin 1-ci sinifinə daxil olub və 2014-cü ildə həmin məktəbi bitirib.
Ali təhsilini Sumqayıt Dövlət Universitetinin Tarix və Coğrafiya fakültəsində alıb.
2015-ci ildə “Bakı 2015” İlk Avropa Oyunlarında iştirakına görə “Təşəkkürnamə” ilə təltif olunmuşdur. Mart-İyun 2015-ci il tarixləri arasında Bakıda keçirilmiş “1-ci Avropa Oyunları”nda Mərasim İştirakçısı olaraq möhtəşəm töhfəsinə görə, 17-19 İyun 2016-cı ildə “FORULA 1 GRAND PRİX OF EUROPE”da könüllü olduğu üçün “Sertifikatla” təltif olunmuşdur. 2017-ci il may ayının 12-dən 22-dək keçirilən “Bakı 2017” İslam Həmrəyliyi Oyunlarında da iştirak etmişdir.
2018-ci ildə həmin univeristeti bitirib və həqiqi hərbi xidmətə gedib.
2019-cu ilin yanvarında hərbi xidmətini başa vurub. Həmin ilin martın 1-də Silahlı Qüvvələrin Təlim və Tədris Mərkəzində təşkil olunan “Ehtiyat zabit hazırlığı kursu”na qəbul edilib. İyunun 4-də kursu bitirib və leytenant rütbəsi alaraq Qazax rayonunda yerləşən N saylı hərbi hissədə xidmətə başlayıb.
Vətən müharibəsi başlayan kimi könüllü olaraq ərizə yazaraq oktyabrın 11-də cəbhənin Füzuli istiqamətində döyüşlərə qatılıb. Ayın 13-də Füzuli rayonunun azadlığı uğrunda gedən döyüşlərdə qəhrəmancasına şəhid olub.
Oktyabrın 30-da Şəki şəhərindəki Şəhidlər xiyabanında torpağa tapşırılıb.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin Sərəncamına əsasən Ətraf Qənimətov Azərbaycan Bayrağı” ordeni ilə, "Vətən Uğrunda" və "Füzulinin azad olunmasına görə" medalları ilə təltif edilib.
