Bakıda rus dilində danışdığı üçün döyüldüyünü iddia edən gəncin müraciəti əsasında araşdırma aparılıb.

Daxili İşlər Nazirliyinin Mətbuat xidmətinin əməkdaşı Nurlan Əliyev "Qafqazinfo"ya bildirib ki, Ramana qəsəbə sakini, 18 yaşlı R.H-nin müraciəti polis tərəfindən araşdırılıb. O qeyd edib ki, tərəflər arasında olan mübahisə rus dilində olan danışıqla əlaqəli deyil:

"Mübahisə şəxsi münasibətlərin pozulması zəminində baş verib. Daxil olan müraciət üzrə müvafiq polis bölməsində araşdırma aparılır. Araşdırmanın nəticəsindən asılı olaraq əmələ hüquqi qiymət veriləcək".

Qeyd edək ki, sosial şəbəkələrdə R.H. telefonda anası ilə rusca danışarkən bir nəfərin bıçaqla ona hücum etdiyini bildirib və fotolarını paylaşıb.

"18 yaşım var. Dünən həyatımın şokunu yaşadım. Anamla telefonda rus dilində danışırdım. Bir də gördüm bir kişi məni təhqir edərək, üstümə hücum çəkdi. Əlində bıçaq var idi. Bıçağın arxası ilə üzümə vurmağa başladı. Qollarıma, kürəyimə vururdu. Təhqir edirdi ki, rus dilində danışıram".

Publika.az xəbər verir ki, bu açıqlamanı Ramana sakini Riad Hüseynəliyev edib.

O, bildirib ki, hələ də başından aldığı zərbələrin təsirindən ayaq üstə rahat dayana bilmir:

"Polis çağırdım. Polis özü baş verən hadisədən şok içində idi. Bu gün ekspertizaya getdim. Üzümdə, bədənimdə hemotomalar var. Üzüm şiş içindədir. Əminəm ki, Azərbaycan polisi bu işi lazımi dərəcədə araşdıracaq və günahkar layiqli cəzasını alacaq. Biz hansı dövrdə yaşayırıq ki, kimisə rus dilində danışdığı üçün döysünlər?!".