Şəhid ailələrindən olan seçicilərim və əhali ilə görüşlərim davam edir.

19 avqust tarixdə ziyarət etdiyim belə ailələrdən biri Sumqayıtda şəhid Vüsal Allahverdiyevin ailəsi oldu. Şəhidimizin anası Hicran Allahverdiyeva bu ziyarətdən məmnunluğunu ifadə etdi, Vüsalın həyatından, xüsusən də döyüş yolundan danışdı.

Daha bir görüş isə Lələtəpə yüksəkliyini fəth edən zabitlərimizdən biri, Şəhid polkovnik Şükür Həmidovun anası Şərqiyyə Həmidova ilə oldu. Şərqiyyə xanımın xeyir-duasını almaq mənə çox xoş oldu.

Hər iki görüşdə seçiləcəyim təqdirdə bu kateqoriyadan olan insanların problemlərini mütəmadi öyrənəcəyimi və aidiyyatı qurumların köməyi, eyni zamanda şəxsi əlaqələrimdən istifadə edərək həllinə nail olacağıma dair söz verdim. Əlbəttə, Allah ömür və imkan verər, biz də sözümüzü tutarıq.

Elə həmin gün Sumqayıtda 8 saylı yataqxanada el ağsaqqalı Fikrət Həsənovun evində oldum, xeyir-duasını aldım. Görüşdə yataqxanada məskunlaşan Zəngilan və Qubadlı sakinləri də iştirak etdilər. Hamı bir ağızdan vurğuladı ki, daima yenilənən və güclənən ölkəmizin Milli Məclisində də həqiqətən “Yenilik zamanıdır!”. Xüsusən də xanım seçicilərim qarşılarında xanım namizədi görməkdən məmnunluqlarını ifadə etdilər.

Onlarla görüş səmimi şəraitdə keçdi, bölgə əhalisinin problemlərinin mənə tanış olduğunu bildirdim. Qeyd etdim ki, seçicilərin problemlərini yaxından, birbaşa öyrənmək üçün onlarla bu qəbildən olan görüşlərimi davam etdirəcəyəm.

Görüşlərimiz davam edir.