"Son zamanlar bizə ünvanlanan müraciətlər içərsində 5 uşaqlı ailələrə aylıq müavinətin ödənilib-ödənilməməsi ilə bağlı xeyili suallar var. Hazırda 5 uşağı olan valdeynlər daha tez pensiyaya çıxmaq hüququna malikdir".

Məlumata görə, bunu Milli Məclisin Əmək və sosial siyasət komitəsinin üzvü Vüqar Bayramov bildirib.

“Əmək pensiyaları haqqında” Qanuna əsasən, 5 və daha çox uşağı olan qadınlar 5 il daha tez pensiyaya çıxırlar. Bu qanuna görə, 5 və daha çox uşağı olan ailələr çoxuşaqlı ailələr hesab olunurlar. Bəs həmin ailələrə aylıq sosial müavinət ödənilməlidirmi?


Vüqar Bayramob deyib ki, “Sosial müavinətlər haqqında” Qanuna əsasən, 5-dən çox uşağı olan ailələr üçün aylıq müavinət müəyyənləşir. Yəni, həmin ailələr hər uşağa görə ayda 105 manat müavinət alırlar. Uşağın 18 yaşı tamam olan ayın sonunadək ödəniş həyata keçirilir. Əgər ailənin bu müavinət ilə bağlı məlumatı olmayıbsa, o zaman müraciət etdiyi arxivdən əvvəlki üç il üçün hesablanmış müavinətləri də ala bilir.


“Sözügedən iki qanunverici aktlara diqqət yetirəndə sosial müavinətlər 5-dən çox, pensiyada güzəşt isə 5 uşağı olan ailələrə şamil olunur. Yəni 5 uşağı olan ailələr pensiyaya daha tez çıxa bilsələr də, sosial müavinət almaq hüququndan yararlana bilmirlər. Bu baxımdan, “Sosial müavinətlər haqqında” Qanunda dəyişiklik edilməsi və müavinət almaq hüququnun 5-dən çox deyil, 5 və daha çox uşağı olan ailələrə şamil olunması məqsədəuyğun olardı.


Əhalinin sonuncu siyahıya alınmasına görə ölkədə 16169 ailə çoxuşaqlı hesab olunur. Onlardan 1524-ü 9 və daha çox uşaqlı, 1748-i 8 uşaqlı, 3565-i 7 uşaqlı və 9332-si 6 uşaqlı ailələrdir. Azərbaycanda 23150 ailədə övlad sayı 5 nəfərdir. Eyni zamanda, 4 və daha çox uşaqlı ailələr 110.4 min, 3 uşaqlı ailələr 256.3 min, 2 uşaqlı ailələr 557.8 min, 1 uşaqlı ailələr 423 mindir.

Bu isə o deməkdir ki, “Sosial müavinətlər haqqında” Qanunun “Əmək pensiyaları haqqında” Qanunun sözügedən maddəsinə uyğunlaşdırılması 23 mindən çox ailəinin ayliq müavinət almasına imkan yarada bilər”.