PJB xarici jurnalistləri Füzuli və Cəbrayıla APARDI
Xəbər verilir ki, Macarıstanın ən böyük çap media orqanı olan "Magyar Hirlap" qəzetinin təmsilçisi Zsolt Sütö Nagy, Bolqarıstanın Dövlət xəbər agentliyinin, “24 chasa” qəzeti və BTV kanalının təmsilçisi Nahidə Youmer, Özbəkistan Jurnalistlər Birliyinin üzvü, “Yoshlar” telekanalının baş redaktoru Həmzə Jumayev Füzuli və Cəbrayıla səfər ediblər, həmçinin Bakıda bir sıra görüşlərdə iştirak ediblər.
Cəbrayıla səfər zamanı xarici media nümayəndələri burada aparılan yenidənqurma və bərpa işləri ilə tanış olublar, şəhərdə məskunlaşan sakinlərlə söhbət ediblər.
Xarici jurnalistlərə bildirilib ki, işğaldan azad edilmiş ərazilərə Böyük Qayıdışa dair I Dövlət Proqramına əsasən, yenidən qurulan Cəbrayıl şəhərinə ilk köç karvanı cəmi bir neçə gün əvvəl gəlib. Bu müddətdə Cəbrayıl şəhərinə 77 ailənin, yəni 241 nəfərin daimi məskunlaşması təmin edilib.
Doğma yurda qayıdan Cəbrayıl sakinləri bu günədək çətin şəraitdə yaşadıqlarını, hazırda hərtərəfli dövlət qayğısı ilə əhatə olunduqlarını bildiriblər.
Jurnalistlər Cəbrayılda erməni vandallığının izləri ilə də tanış olub, dağıdılan, yerlə-yeksan edilən kəndlərə baş çəkiblər.
Sonra media nümayəndələri Füzuli şəhərinə səfər edərək burada aparılan bərpa-quruculuq işləri ilə yaxından tanış olublar. Füzuliyə qayıdan sakinlərin məşğulluğunun artırılması üçün aparılan genişmiqyaslı tədbirləri, yaşayış üçün yaradılan şəraiti müşahidə ediblər.
Yerli sakinlər bildiriblər ki, doğma rayona qayıdış illərlə çəkdikləri iztiraba, yurd həsrətinə son qoyub.
Keçmiş məcburi köçkünlər Füzulini yenidən qurub-yaradacaqlarını, əvvəlkindən daha gözəl, abad vəziyyətə gətirəcəklərini qeyd edərək, dövlət qayğısı ilə əhatə olunduqlarını vurğulayıblar.
İndiyədək Füzuli şəhərinə 820-dən çox ailənin (3100 dən çox sakin) daimi məskunlaşmasının təmin edildiyi, bu şəxslərin son illərdə respublikanın müxtəlif ərazilərində yataqxana, sanatoriya, yarımçıq tikililər və inzibati binalarda müvəqqəti məskunlaşdıqları bildirilib.
Qeyd edək ki, səfər Qeyri-Hökumət Təşkilatlarına Dövlət Dəstəyi Agentliyinin dəstəyi ilə keçirilən “Köçkünlüyə son: məskunlaşma prosesinin xarici mediada təbliği” layihəsi çərçivəsində baş tutub.
