"Bakıda qətl hadisəsinə görə polisdə xidməti yoxlamalara başlanılıb. Hadisənin nəticəsilə bağlı polis əməkdaşlarının hər hansı fəaliyyətsizliyi, yaxud səhlənkarlığı ilə əlaqəli məqam üzə çıxarsa, dərhal müvafiq qaydada tədbir görüləcək".



Bunu açıqlamasında Daxili İşlər Nazirliyinin (DİN) Mətbuat xidmətinin rəisi, polis polkovniki Ehsan Zahidov Bakıda ana və azyaşlı övladlarının qətlilə bağlı sosial şəbəkələrdə yayılan iddialara münasibət bildirərkən deyib.



DİN rəsmisi bildirib ki, məsələ ilə bağlı xidməti yoxlama başlanılıb:



“Törədilən bütün qətl hadisələri ilə bağlı prokurorluq orqanlarında aparılan istintaqla bərabər, eyni zamanda, Daxili İşlər Nazirliyində də xidməti yoxlamalar aparılır. Dünənki ağır faciəvi cinayətlə əlaqədar artıq hadisəni törətməkdə şübhəli bilinən Əhəd Əliyev müəyyən edilərək saxlanılıb. Bu hadisə ilə bağlı başlanan cinayət işi üzrə prokurorluqda istintaq aparılır.

Həmçinin, Daxili İşlər Nazirliyində də bu qətl hadisəsi ilə bağlı xidməti yoxlama aparılır. Xidməti yoxlama zamanı polis əməkdaşlarının hər hansı fəaliyyətsizliyi, yaxud səhlənkarlığı ilə əlaqəli hansısa məqam üzə çıxarsa, dərhal müvafiq qaydada tədbir görüləcək".



Onun sözlərinə görə, sosial şəbəkələrdə yayılan iddialar hələ ki, təsdiqini tapmayıb. Bir nüansı nəzərə almaq lazımdır ki, cinayəti törədən mərhumların yaxın qohumudur, daim gediş-gəlişi olan, ailənin bir üzvü kimi yaxın olan bir şəxsdir”.



Sosial şəbəkədə yayılan iddiada deyilir:



"Səhər dəhşətlə oxuduğum xəbəri dostluğumda olan qonşusu təsvir edir: "Dünən axşam bizdən 1 mərtəbə yuxarıda qalan qonşu qadın və 2 uşağı bıcaqlanaraq öldürüldü. Axşam evdən uşaqların qışqırıq səsini eşidən kimi qonşularla yığışıb qapını açmağa çalışdıq, gördük ki, bacarmırıq polisə zəng vurduq. Gələn polis əməkdaşları səsləri eşitsələr də "ailə münaqişəsidir içəri girməyə ixtiyarımız yoxdur. Siz də dağılışın burda qalmayın" deyib çıxıb getdilər. Onlar gedəndən az sonra səslər kəsildi. Biz də düşündük ki, yəqin problemi aralarında həll edə biliblər. Səhər məlum oldu ki, qadın, 15 yaşlı qızı və kiçik oğlu öz kürəkəni (bacısının yoldaşı) tərəfindən öldürüb..".