Sumqayıtda 36 nömrəli tam orta məktəbin yenidənqurmadan sonra açılışı olub
Açılış mərasimində elm və təhsil nazirinin müavini Kənan Kərimzadə, Sumqayıt şəhər İcra Hakimiyyətinin başçısı Zakir Fərəcov, Abşeron-Xızı Regional Təhsil idarəsinin müdiri İlhamə Abdullayeva, məktəbin pedaqoji kollektivi və şagirdlər iştirak ediblər.
Tədbir Azərbaycan Respublikasının Dövlət Himninin səsləndirilməsi ilə başlayıb.
Tədbirdə çıxış edən Sumqayıt şəhər İcra Hakimiyyətinin başçısı Zakir Fərəcov müəllim və şagird kollektivini Bilik Günü münasibətilə təbrik edərək, yeni tədris ilində uğurlar arzulayıb.
Şəhər rəhbəri bildirib ki, Sumqayıt təhsil sahəsində daim yüksək nəticələr göstərir və hər il şəhər məktəblərinin məzunları qəbul imtahanlarında ölkə üzrə ən yüksək nəticələrə imza atırlar: “Bu uğurlar müəllimlərimizin fədakar əməyinin və şagirdlərimizin zəhmətsevərliyinin göstəricisidir. Əminəm ki, yenilənmiş bu məktəb gələcəkdə də elmə maraqlı, vətənpərvər gənclərin yetişməsində mühüm rol oynayacaq”.
Elm və təhsil nazirinin müavini Kənan Kərimzadə öz çıxışında ölkə rəhbərliyinin təhsilə göstərdiyi xüsusi diqqət və qayğını vurğulayıb: “Son 20 ildə Prezident İlham Əliyevin təşəbbüsü ilə qəbul edilən dövlət proqramları, Birinci vitse-prezident Mehriban Əliyevanın və Heydər Əliyev Fondunun rəhbərliyi ilə həyata keçirilən layihələr nəticəsində ölkə ərazisində 3500-dən çox məktəb binası ya yenidən tikilib, ya da əsaslı təmir olunub. Bu, Azərbaycan təhsilinin inkişafında mühüm dönüş nöqtəsidir”.
Nazir müavini yeni tədris ilində məktəb kollektivinə uğurlar arzulayıb və məktəbin müasir təhsil mühitinin yaradılmasının Sumqayıtda təhsilin inkişafına əlavə təkan verəcəyinə əminliyini bildirib.
Çıxışlardan sonra tədbir iştirakçıları məktəbin sinif otaqları, fənn kabinetləri, laboratoriyalar, kitabxana, idman və akt zalları ilə tanış olublar.
Qeyd olunub ki, 1989-cu ildən fəaliyyət göstərən və 1296 şagird yeri olan məktəb binası 2023-cü ilin dekabr ayında əsaslı təmirə verilib, təmir işləri isə 2025-cü ilin avqustunda tamamlanıb.
Təhsil müəssisəsinin ümumi tikinti sahəsi 3262 kvadratmetr təşkil edir. Müasir tələblərə uyğun inşa olunan üçmərtəbəli binada 46 sinif otağı, 6 laboratoriya, 2 informatika otağı, 1 tibb otağı, 2 əmək təlimi otağı, 1 hərbi hazırlıq otağı, 1 kitabxana və oxu zalı, 220 nəfərlik akt zalı, 216 nəfərlik yeməkxana, 2 idman zalı, 12 sanitariya qovşağı və 1 qardirob istifadəyə verilib.
Məktəb binası internet şəbəkəsi, 162 kompüter, 462 parta, 924 stul, 12 kondisioner, təhlükəsizlik kameraları, laboratoriya cihazları, fərdi qazanxana, istilik sistemi və su-elektrik təminatı ilə də təchiz olunub. Həyətyanı sahədə abadlıq və yaşıllaşdırma işləri aparılıb.
Yeni tədris ili üçün məktəbdə 1086 şagird qeydə alınıb və 74 pedaqoji, 32 texniki işçi olmaqla ümumilikdə 101 nəfərlik kollektiv fəaliyyət göstərəcək. Təhsil müəssisəsi eyni zamanda “Rəqəmsal bacarıqlar” layihəsinə də qoşulub.
