8 Noyabr - Zəfər Gününün beşinci ildönümü ilə bağlı Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəliyi tərəfindən dəyirmi masa təşkil edilmişdir.
Laçın Rayonu İcra Hakimiyyəti başçısının Mişni kənd inzibati ərazi dairəsi üzrə nümayəndəliyinin 2025-ci il 22 oktyabr tarixli 5-64-30/3-1-4/2025 nömrəli əmri ilə təsdiq edilmiş “2025-ci il 8 noyabr - Zəfər Gününün beşinci ildönümünün qeyd edilməsi ilə bağlı Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəliyinin tədbirlər planı”nın icrası ilə əlaqədar 2025-ci il 3 noyabr tarixdə Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəliyinin təşkilatçılığı ilə Laçın Rayon Mişni kənd körpələr evi-uşaq bağçası ilə birgə Bakı şəhəri, Qaradağ rayonu, Ümid qəsəbəsində fəaliyyət göstərən Mişni kənd körpələr evi -uşaq bağçasının binasında dəyirmi masa keçirilmişdir.
Təşkil edilmiş dəyirmi masada Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəliyinin işçiləri, Mişni kənd körpələr evi-uşaq bağçasının əməkdaşları, şəhid ailə üzvləri, müharibə əlilləri, müharibə veteranları, Mişni kənd ictimaiyyətinin nümayəndələri iştirak etmişlər.
Tədbirdə əvvəlcə torpaqlarımızın işğaldan azad olunması uğrunda canından keçən qəhrəman şəhidlərimizin ruhu bir dəqiqəlik sükutla yad edilmişdir.
Tədbirdə çıxış edən Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəsi Azər Orucov çıxışında qeyd etmişdir ki, XX əsrin 80-ci illərinin sonları-90-cı illərinin əvvəllərində Ermənistan Azərbaycanın tarixi torpaqlarına açıq formada ərazi iddiaları ilə çıxış etmiş və ölkəmizə qarşı hərbi təcavüzə başlamışdır. Həmin dövrdə Azərbaycanda hökm sürən hərc-mərclikdən istifadə edən Ermənistan torpaqlarımızın 20%-ni işğal etmiş, Ermənistanın həyata keçirdiyi etnik təmizləmə siyasəti nəticəsində bir milyondan artıq azərbaycanlı öz doğma yurd-yuvasından didərgin düşmüşdür. 2020-ci il sentyabrın 27-də Ermənistan Respublikasının silahlı qüvvələri beynəlxalq hüquq normalarını yenidən kobud surətdə pozmuş və ilk gündən Azərbaycan Respublikasının Silahlı Qüvvələri tərəfindən başlanılmış əks-hücum əməliyyatları nəticəsində Azərbaycan Respublikasının bir neçə rayonu, eləcə də strateji əhəmiyyətli digər əraziləri işğaldan azad edilmişdir. Vətən torpaqlarını işğaldan azad edən rəşadətli və müzəffər ordumuzun həyata keçirdiyi uğurlu hərbi əməliyyatlar nəticəsində Ermənistanın silahlı qüvvələri darmadağın edilmişdir. 44 günlük Vətən müharibəsində düşmən üzərində tarixi qələbəmizin nəticəsidir ki, bu gün dövlət bayrağımız işğaldan azad edilmiş bütün ərazilərimizdə dalğalanır.
Daha sonra tədbirdə çıxış edənlər 8 noyabr - Zəfər Gününün beşinci ildönümü ilə bağlı qəhrəman şəhidlərimizin igidlik salnamələrindən söhbət açmış, onların keçdiyi şərəfli döyüş yollarından danışmışlar.
8 noyabr - Zəfər Gününün beşinci ildönümü ərəfəsində Laçın Rayon İcra Hakimiyyəti başçısının Mişni kənd inzibati ərazi dairəsi üzrə nümayəndəliyi tərəfindən bir sıra tədbirlərin davam etdiriləcəyi nəzərdə tutulmuşdur.
